Testigos de Jehova nisqa organizacionmanta kajkuna
runakunaqa ninku: Noqallayku cheqa cristianos kay
pachantimpi kayku. Waj iglesias: Católicos, evangélicos
imaqa pantasqata yachachinku. Mana Testigo de Jehovachu
kajkunataqa Dios chinkaraparichenqa, nispa ninku Testigosqa.
Chaywampis, imastachus nisqankupi, ruwasqankupi ima yachakun
paykunaqa phutiy pantasqapi kasqankuta. Tawa imasta
qhawarispalla sut’ita yachasun, Testigos de Jehova
nisqakunata manapuni kasuna kasqanta.
1. Testigos de Jehová nisqakunaqa
qhesachanku Bibliaj jatuchaj yachachiykunanta.
Testigos de Jehovaqa ninku: Jesuscristoqa mana Dioschu,
nispa. Astawanqa yachachinku Jesucristoqa Diospa
ruwasqan uj angellla kasqanta.
Diosmanta Qhelqasqarí sut’ita yachachin Jesucristoqa Dios Churi kasqanta. Hebreos 1:8 nin: "Churimantatajrí nin: Diosníy, kamachina tiyanaykeqa wiñaypa wiñaynintinkama kanqa..." Qhawarillaytaj: Juan 1:1,14; Juan 20:26-28; Hechos 20:28; Romanos 9:5; Hebreos 1:3,8-9; 2 Pedro 1:1.
Testigos de Jehovaqa ninku: Jesucristoqa mana cuerpompichu kawsarimporqa, nispa. Astawanqa yachachinku Jesuspa cuerponqa wawsi jina chinkapusqanta; Dios Tata chinkachipusqanta, nispa ninku. Testigos de Jehovata qallarej runa Charles Taze Russell yachacherqa: Jesús runaqa wañusqa kashan wiñaypaj, nispa. (Chay nisqanqa qhelqasqa kashan: "Estudios en las Escrituras" Vol. 5, 1899, pag. 454).
Diosmanta Qhelqasqarí sut’ita yachachin Jesusqa aycha cuerponniyoj kawsarimpusqanta. Lucas 24:39, chaypi Jesús nerqa: Qhawariychej makisniyta, chakisniyta ima. Noqa kikiy kani. Llankhawaychej, qhawaychejtaj, imaraykuchus uj almaqa mana aychayojchu, nitaj tulluyojchu, noqajta rikushankichej jina, nispa. Qhawarillaytaj: Juan 2:19-21; Juan 20:26-28; 1 Corintios 15:6,14.
Testigos de Jehovaqa ninku: Espiritu santoqa mana Dioschu, nispa. Astawanqa yachachinku Espíritu Santoqa electricidad corriente jinalla uj kallpa kasqanta.
Diosmanta Qhelqasqarí sut’ita yachachin Espiritu Santoqa Diospuni kasqanta. Hechos 5:3,4 nin: Chantá Pedro payta nerqa: Ananías, imaraykutaj Santanasta sonqoykipi kasunki Espíritu Santoman llullakunaykipaj... Qanqa mana runasmanchu llullakunki, astawanqa Diosman, nispa. Chantá qhawarillaytaj: Juan 14:16-17; Juan 16:13-15; Romanos 8:26-27; 2 Corintios 3:6,17-18; Efesios 4:30.
Testigos de Jehovaqa ninku: Diosqa mana pimampis salvacionta qhasillaqa jaywanchu, nispa. Astawanqa yachachinku: Sichus pipis munan Diospa juicionmanta salvasqa kayta chayqa, Testigo de Jehová nisqa kajkunaman k’askakunan tiyan, paykunapajtaj trabajanan tiyan, nispa.
Diosmanta Qhelqasqarí sut’ita yachachin salvaciontaqa mana pipis ganakuyta atisqanta, manachayqa Dios qosqanta qhasilla. Efesios 2:8,9 nin: Diospa qhasilla k’acha yanapayninnejta creeyrayku salvasqa kankichej, mana chaypaj jina kashajtiykichej. Chaytaj mana qankunamantachu jamun, manachayqa Diospa qhasilla jaywasqan. Manataj ima ruwasqaraykuchu salvasqa kankichej, ama pipis jatunchakunampaj, nispa. Qhawarillaytaj: Romanos 4:1-4; Gálatas 2:16; Tito 3:5.
Testigos de Jehovaqa ninku: Juchasapapajqa mana ima castigopis kanqachu, nispa. Astawanqa yachachinku juchasapakunaqa chinkasqata chinkachisqa kanankuta.
Diosmanta Qhelqasqarí sut’ita yachachin juchasapakunaqa castigasqapuni kanankuta. Mateo 25:41,46 nin: Chantá lloq’empi kajkunaman nenqa: Riychej kaymanta, sajra runas, wiñay nina larwayman, mayqenchus wakichisqa kashan Kuraj Supaypaj, chantá angelesnimpaj ima, chayman. Chaykunaqa wiñay ñak’ariyman renqanku, cheqan kajta ruwajkunataj wiñay kawsayman renqanku, nispa. Qhawarillaytaj Mateo 18:8; 2 Tesalonisenses 1:8-9; Apocalipsis 14:10,11; Apocalipsis 20:10,15.
Testigos de Jehovaqa ninku: Runaqa mana espirituyojchu (almatojchu) runa wañuspapis kawsakunallampajpuni, nispa. Astawanqa yachachinku runaqa wañuytawan, uj uywa jinalla tukusqata tukukapunanta.
Diosmanta Qhelqasqarí sut’ita yachachin, runa wañojtenqa, espíritun (alman nisunchu) kawsakullasqantapuni sumaj yuyaynimpi. 2 Corintios 5:8 nin: Noqanchej astawanraj munasunman kay cuerponchejta saqespa, Señorwan khuska kayta, nispa. Qhawarillaytaj: Lucas 16:19-31; Filipenses 1:23-24; Apocalipsis 6:9-11.
Testigos de Jehovaqa ninku: Diospa ñawpaqempi wiñay kawsayqa uj mashkha ajllasqasllapaj kashan, nispa. Astawanqa yachachinku: Pachaj tawa chunka tawayoj runaslla jaqaypeqa kanqanku; chaykunataj kanqanku Testigos de Jehová kajkunallamanta. Chaykunalla janaj pachapeqa Dioswan wiñaypaj kawsanqanku. Chay wakin Testigos de Jehovamanta kajkunataj kay pachallapi kawsanqanku, nispa ninku.
Diosmanta Qhelqasqarí sut’ita yachachin: Pikunachus Jesuspi creespa sonqonkuta churajkunaqa janaj pachapi, Diospa ñawpaqempi wiñaypaj kawsanqanku. Chaykunamanta parlaspa Bibliaqa nin, yupay mana atina may chhikaspuni kasqankuta. Apocalipsis 7:9,15 nin: Chay imas qhepata, may chhika runasta rikorqani, mana yupay atinata tukuy nacionesmanta, ayllusmanta, runasmanta, tukuy parlaykunamantawan. Paykunaqa kamachina tiyanaj ñawpaqempi, Corderoj ñawpaqempiwan kasharqanku... Diospa kamachinan tiyanampa ñawpaqempi kashanku, tuta p’unchaytaj templopi sirvinku, nispa. Qhawarillataj: Juan 3:15; Juan 5:24; Juan 12:26; Efesios 2:19; Filipenses 3:20; Colosenses 3:1; Hebreos 3:1; 12:22; 2 Pedro 1:10,11.
Testigos de Jehovaqa ninku: Diosqa mana kinsa ukhupichu. Chay yachachiytaqa Kuraj Supaylla wakicherqa, nispa. Diosmanta Qhelqasqapi maynejpichus nishan Jesucristoqa Dios kasqanta, Espíritu Santoqa Dios kasqanta, chay qhelqasqasta qhesachasqata qhesachanku.
Diosmanta Qhelqasqarí sut’ita yachachin Churi, Espíritu Santo, Tata ima Dios kasqanta. Diosmanta Qhelqasqa yachachin uj k’ata Dios kasqanta, (Isaías 43:10; 44:6,8). Jinallataj Mateo 28:19 chaypi Jesús parlan Tatamanta, Churimanta, Espíritu Santomanta ima. Chaytaj rikuchin Diosqa kinsa ukhupi uj Dioslla kasqanta.
Pikunachus Testigo de Jehova kajkunaman k’askakojkunaqa Diosmanta Qhelqasqaj jatuchaj yachachiykunanta qhesachajkunaman k’askakushanku.
2. Testigos de Jehová nisqakunaqa q’ewinku Diosmanta Qhelqasqaj nisqasninta.
Testigos de Jehová nisqamanta kajkunaqa wajta Diosmanta Qhelqasqata ruwakunku q’ewisqata. Chay ruwasqanku Bibliaj sutin kashan: Traducción del Nuevo Mundo de las Sagradas Escrituras, nisqa. Chay ruwakusqanku Bibliapeqa, yachashaspa ashkha versiculosta q’ewisqasta churanku. Chay q’ewisqankuwan Testigos de Jehovaqa pakaykunku llulla yachachisqanku ama rikukunampaj.
| Kaypi kikinchachisun cheqa kaj Bibliata, Ruwakusqankutawan | |
| Cheqa Kaj Biblia | Ruwakusqanku Biblia |
|
Juan 1:1 nin: "Qallariypeqa Palabra karqapuni. Chay
Palabraqa Dioswan kasharqa, Palabraqa Diospuni
karqa." Chayqa sut’ita yachachin Jesusqa (Palabraqa) Dios kasqanta. |
Juan 1:1 nin: "Qallariypeqa Palabra karqa. Chay
Palabraqa Dioswan kasharqa. Chay Palabraqa uj dios
karqa." Kay ruwasqankoqa paykunaj yachachisqankuman kutisqa kashan, imaraykuchus nishan Jesusqa mana Diospunichu kasqanta. |
|
Colosenses 1:16 nin: "Paynejtamin Diosqa tukuy kaj
chhikata ruwasqa ... tukuy kaj chhikata ruwarqa
paynejta, paypajtaj." Chayqa yachachiwanchej Jesusqa tukuy kaj chhikata ruwasqanta. Jinaqa, mana Payqa wajpa ruwasqanchu kanman. |
Colosenses 1:16 nin: "Paynejta tukuy waj imasqa
ruwasqa karqa ... Tukuy waj imasqa paynejta ruwasqa
karqa paypajtaj." Chayman "waj" nisqaqa yapaykusqa kashan paykunaj yachachisqankuman kutisqa kanampaj, imaraykuchus ninku Jesusqa ruwasqa angellla kasqanta. |
|
Hebreos 1:8 nin: "Churimantatajrí nin: Diosníy,
kamachina tiyanaykeqa wiñaypa wiñaynintinkama
kanqa..." Reparay, chaypeqa Dios Tata nin Jesús Chureqa "Dios" kasqanta. |
Hebreos 1:8 nin: "Churimantatajri nin: Diosqa
kamachina tiyanan wiñaypaj kanqa..." Testigos de Jehová pata chakisqamanta churanku, yachachisqankuman kutisqa kanampaj, Jesusqa mana Dioswan kikinchasqachu ninankupaj. |
Pikunachus Testigo de Jehová kajkunaman
k’askakojkunaqa Diosmanta Qhelqasqaj yachachiykunanta
q’ewijkunaman k’askakushanku.
3. Testigos de Jehová nisqakunaqa
ninku imachus aswan jaqayman kananta; chay nisqankutajrí ni
jayk’aj junt’akunchu.
Testigos de Jehovakunajpa kurajkunankoqa ninku jamoj
imasmanta parlasqankuta Diospa atiyninwampuni; chaywampis
chay parlasqankoqa manapuni junt’akunchu. Paykunaqa nisqanku
chay Armagedón nisqa wañuchinaku maqanakuytaj, kay pachaj
tukukuynintaj 1975 kaj watapi kananta. Kunan p’unchaymanta
kajkuna Testigosrí mana yachaj tukunku chaymanta.
Chantá phishqa kutita nisqanku kay pacha tukukunanta: 1914
kaj watapi, ujtawan nillarqankutaj 1915 kaj watapi, 1918 kaj
watapi, 1925 kaj watapi, 1942 kaj watapi ima. Sapa kuti chay
nisqanku mana junt’akojtin, chay watata qhepan wataman
suchuchisqanku. Chay imasmanta jawa nillasqankutaj: Ñawpa
runas Abraham, Isaac, Jacob imaqa 1925 kaj watapi
kawsarimonqanku, nispa. Chaypis manallataj junt’akorqachu.
Diosmanta Qhelqasqa nin, pejpa nisqampis mana junt’akojtenqa
llulla profeta kasqanta, (Deuteronomio 18:21-22).
Pikunachus Testigo de Jehová kajkunaman
k’askakojkunaqa jamoj imasmanta llullakojkunaman
k’askakushanku.
4. Testigos de Jehovamanta
kamachejkunaqa mana sonqoyoj kanku.
May chhika kutita pantashaspapis, Testigos de Jehovamanta
kajkunaqa nishallankupuni, paykunaj yachachiyninku jinapuni
kasqanta, paykunalla cheqa cristianos kasqankuta. Ninku:
Noqaykumanta jawaqa mana maypipis cheqa kaj yachachiyta
pipis tarenqachu, nispa. Yachachinku salvacionqa paykuna
ukhullapi kasqanta, yachachillankutaj mana Testigo de
Jehovachu kajkunaqa Armagedompi chinkachisqa kanankuta.
Testigos de Jehová nisqa organisaciompi kamachejkunaqa tukuy
chaypi kajkunata ninku: Kamachejkunanchejpa nisqankuta
kasunapuni kashan imapis kachun, nispa.
Onqosqa kaspa, chayrí imanakuspa paykuna ukhumanta mayqempis
yawarmanta jina wañunayashajtimpis, paykuna manapuni waj
yawarta churachikunankuta munankuchu. Jinata qhawakunku
wañojta chay kamachisqankuta mana p’akinankurayku. Bibliarí,
mana maynejpipis yachachinchu waj yawarta churachikuy mana
allinchu kasqanta. Paykunamanta mayqenchus chay kamachiyta
p’akejtaqa ninku: Armagedompi wañuchinaku chayamojtin,
chinkachisqapuni kanki, nispa. Ajinata ari chay
kamachejkunaqa manchachinku, kamachiyninkupi kajkuna imapis
kachun kasunankupaj.
Pikunachus Testigo de Jehová kajkunaman
k’askakojkunaqa chay jina mana sonqoyoj runakunajpa
kamachiynin uraman churakushanku.
Chay tawa imas nisqanchejpi, Testigos de Jehová nisqakunaj
yachachisqantaqa mana kasuna jinallachu kasqanta. Chantá
ichapis qanqa sonqoykipi ujta tapukushanki: Imataj kashan
cheqamanta Diosmanta Qhelqasqaj chay sumaj willayninri?
nispa. Diosmanta Qhelqasqaqa Jesucristoj cheqa
evangelionmanta yachachin sut’ita tawa yuyayllapi.
Dioswan allimpi kayta imaynatataj
pipis tarinman?
Bibliaqa tawa imasta sut’ita rikuchin:
1. Juchasninchejpuni t’aqawanchej kawsaj cheqa Diosmanta.
"Tukuy runas juchallikusqankurayku, paykunaqa Diospa jatun
kaynimpa k’anchayninta mana taripayta atinkuchu." Romanos
3:23
"Juchaj pagonqa wañuymin; Diospa regalonrí wiñay kawsay
Cristo Jesús Señorninchejpi." Romanos 6:23
2. Noqanchej kikinchejqa manapuni salvakuyta
atisunmanchu.
"Leypa kamachisqasninta ruwasqanrayku mana pipis Diospa
ñawpaqempi cheqan runapaj qhawasqachu kanqa, manachayqa
leynejta reparakunchej juchayoj kasqanchejta." Romanos 3:20
"Mana noqanchej, ima allinta ruwasqanchejraykuchu Dios
salvawarqanchej, astawanqa khuyakuyninraykulla." Tito 3:5
3. Jesucristollamin kashan Diospa qosqan
juchasninchejmanta salvanawanchejpaj.
"Diosqa chay jinatapuni kay pachapi kaj chhikata
munakusqanrayku, uj k’ata Churinta qorqa. Ajinamanta
pillapis Paypi creejqa mana chinkayman renqachu, astawanqa
wiñay kawsayniyoj kanqa." Juan 3:16
"Cristopis jucharayku uj kutillata ñak’arerqa; cheqan kajqa
juchasapasrayku wañorqa, Dios Tataman pusanawanchejpaj." 1
Pedro 3:18
4. Noqanchej kikinchej Jesucristopi creenanchej,
jap’ikunanchejtaj juchasninchejmanta perdonasqa kanapaj,
wiñay kawsayniyojtaj kanapaj.
"Astawampis sutimpi creejtinku, tukuy Payta jap’ikojkunaman
atiyta qorqa Diospa wawasnin ruwasqa kanankupaj." Juan 1:12
"Sichus simiykiwan runaspa uyarinanta ninki Jesusqa Señor
kasqanta, creenkitaj sonqoykipi Dios wañusqakunamanta payta
kawsarichimusqanta chayqa, salvasqa kanki." Romanos 10:9
Sichus Bibliaj kay yachachisqasnin sonqoykiman chayan
chayqa, kunampacha atiwaj Diosmanta perdonninta mañakuyta,
jinallataj, Cristo mosoj kawsayta qosunanta mañakuyta.
Jesucristopi creesqaykita ninaykipaj Diosman chimpayta
atiwaj kay jinata nispa:
Diosman parlay (Oración)
Tukuy atiyniyoj, khuyakoj Dios:
Contraykipi juchachakuni imasta ruwaspa, parlaspa, yuyaspa.
Cheqan kayniykiman mana wakinichu; noqa kikiy mana
salvakuyta atinichu. Pachi niyki Churiyki Jesusta
kachamusqaykimanta noqarayku cruzpi wañunampaj. Mañakuyki
tukuy juchasniyta pampachanaykita. Sonqoyta churani
Jesucristopi, imaraykuchus Pay wañorqa cuentaymanta,
kawsarimporqataj. Ajina kachun.